ᱡᱤᱭᱚᱱ ᱰᱷᱚᱸᱜᱟ

ᱡᱤᱭᱚᱱ ᱰᱷᱚᱸᱜᱟ ᱫᱚᱛᱤᱧ 

ᱞᱤᱵ ᱞᱟᱵᱚᱜ ᱠᱟᱱ

ᱥᱚᱝᱥᱟᱨ ᱥᱟᱹᱢᱩᱫᱽ ᱛᱟᱞᱟ ᱨᱮ, 

ᱦᱟᱱᱟ ᱰᱷᱤᱯ ᱦᱚᱸ ᱵᱟᱝ 

ᱪᱮ ᱱᱚᱶᱟ ᱰᱷᱤᱯ ᱦᱚᱸ ᱵᱟᱝ

ᱦᱟᱱᱟ ᱯᱩᱨᱤ ᱦᱚᱸ ᱵᱟᱝ 

ᱪᱮ ᱱᱚᱶᱟ ᱯᱩᱨᱤ ᱦᱚᱸ ᱵᱟᱝ, 

ᱤᱧ ᱢᱟ ᱛᱟᱞᱟ ᱯᱩᱨᱤ ᱨᱮ 

ᱤᱧ ᱢᱟ ᱡᱟᱞᱟ ᱯᱩᱨᱤ ᱨᱮ, 

ᱡᱤᱭᱚᱱ ᱰᱷᱚᱸᱜᱟ ᱫᱚᱛᱤᱧ 

ᱞᱤᱵ ᱞᱟᱵᱚᱜ ᱠᱟᱱ

ᱥᱚᱝᱥᱟᱨ ᱥᱟᱹᱢᱩᱫᱽ ᱛᱟᱞᱟ ᱨᱮ ᱾

ᱚᱥᱟᱹᱜᱩᱱ

 ᱢᱩᱬ ᱦᱤᱱᱫᱤ- ᱥᱤᱞ ᱠᱚᱣᱥᱤᱠ

                  ᱵᱟᱨ ᱫᱤᱱ ᱜᱟᱱ ᱦᱩᱭᱮᱱᱟ ᱢᱤᱫᱴᱮᱱ ᱥᱮᱛᱟ ᱵᱷᱩᱜ ᱫᱚ ᱵᱟᱝᱟ ᱠᱟᱸᱭ ᱠᱟᱸᱭ ᱮ ᱨᱟᱜ ᱮᱫᱟ ᱾ ᱡᱟᱦᱟᱸᱭ ᱚᱲᱟᱜ ᱥᱟᱢᱟᱝ ᱨᱮᱜᱮ ᱨᱟᱜ ᱮᱫᱟ ᱡᱷᱚᱛᱚ ᱜᱮ ᱦᱟᱯᱟ ᱥᱟᱯ ᱠᱟᱛᱮ ᱠᱯ ᱞᱟᱦᱟ ᱠᱮᱫᱮᱟᱭᱟ ᱾ ᱥᱮᱛᱟ ᱦᱟᱜ ᱱᱚᱝᱠᱟᱱ ᱨᱟᱜ ᱟᱧᱡᱚᱢ ᱛᱮ ᱟᱹᱛᱩ ᱦᱚᱲ ᱪᱟᱨᱪᱟ ᱠᱚ ᱮᱦᱚᱵ ᱠᱮᱫᱟ ᱾ 

               ᱢᱤᱫ ᱦᱚᱲ ᱮ ᱢᱮᱱ ᱠᱮᱫᱟ, ''ᱥᱮᱛᱟ ᱱᱚᱝᱠᱟ ᱠᱟᱸᱭ ᱠᱟᱸᱭ ᱪᱮ ᱛᱩᱭᱩ ᱞᱮᱠᱟ ᱨᱟᱜᱽ ᱫᱚ ᱚᱥᱟᱹᱜᱩᱱ ᱨᱮᱭᱟᱜ ᱞᱚᱪᱷᱱᱟ ᱠᱟᱱᱟ ᱾ ᱴᱚᱞᱟ ᱨᱮᱜᱮ ᱨᱟᱢᱮᱥᱚᱨ ᱵᱟᱹᱵᱩᱭ ᱨᱩᱣᱟᱹᱜ ᱠᱟᱱᱟ, ᱪᱮᱫ ᱠᱚ ᱯᱟᱪᱷᱮ ᱦᱩᱭ ᱮᱢᱟᱱᱚᱜ-ᱟ?'' 

              ᱟᱨ ᱢᱤᱫ ᱦᱚᱲ ᱮ ᱢᱮᱱ ᱠᱮᱫᱟ, ''ᱥᱮᱛᱟ ᱫᱚ ᱡᱚᱢ ᱨᱟᱡᱟ ᱦᱟᱜ ᱩᱢᱩᱞ ᱠᱚ ᱧᱮᱧᱟᱢ ᱞᱮᱠᱷᱟᱱ ᱱᱚᱝᱠᱟ ᱠᱚ ᱨᱟᱜᱟ!''

              ᱛᱮᱥᱟᱨ ᱦᱚᱲ ᱮ ᱢᱮᱱ ᱠᱮᱫᱟ, ''ᱦᱚᱞᱟ ᱧᱤᱫᱟᱹ ᱵᱟᱡᱟᱨ ᱠᱷᱚᱱᱟᱜ ᱨᱩᱣᱟᱹᱲ ᱡᱚᱠᱷᱮᱡ ᱚᱱᱟ ᱵᱟᱲᱮ ᱫᱟᱨᱮ ᱴᱷᱮᱱ ᱪᱤᱞᱤ ᱪᱚᱠᱚ ᱨᱟᱜᱟᱥ ᱨᱚᱜᱚᱥ ᱟᱹᱫᱤᱧᱟ ᱾ ᱟᱹᱰᱤᱧ ᱵᱚᱨᱚᱭᱮᱱᱟ, ᱟᱹᱛᱩ ᱠᱚᱢᱟ ᱢᱚᱴᱷᱮ ᱵᱮᱥ ᱜᱮ ᱵᱟᱝ ᱵᱩᱡᱷᱟᱹᱜ ᱠᱟᱱᱟ ᱾''

             ᱟᱨ ᱢᱤᱫ ᱦᱚᱲ, ᱡᱟᱦᱟᱸᱭ ᱫᱚ ᱱᱩᱠᱩᱣᱟᱜ ᱠᱟᱛᱷᱟ ᱛᱷᱤᱨ ᱛᱷᱟᱨ ᱮ ᱟᱧᱡᱚᱢᱮᱫ ᱛᱟᱦᱮᱸᱫ, ᱮ ᱢᱮᱱ ᱠᱮᱫᱟ, ''ᱮᱭᱟ ᱩᱱᱤ ᱥᱮᱛᱟ ᱢᱟ ᱟᱞᱮ ᱚᱲᱟᱜ ᱨᱮ ᱵᱟᱥᱟ ᱞᱮᱱ ᱾ ᱩᱱᱤ ᱤᱧ ᱥᱮᱫ ᱠᱚᱭᱚᱜ ᱠᱟᱛᱮ ᱦᱩᱻᱦᱩᱻᱭ ᱨᱟᱜ ᱠᱮᱫᱟ ᱾ ᱫᱟᱠᱟ ᱠᱚᱞᱮ ᱮᱢᱟᱫᱮ ᱠᱷᱟᱱ ᱮ ᱵᱩᱨᱩᱢ ᱛᱷᱤᱨ ᱮᱱᱛᱮ ᱢᱤᱫᱴᱟᱝ ᱛᱷᱚᱯᱟ ᱫᱚ ᱞᱮᱛᱟᱲ ᱮ ᱡᱟᱞᱮᱫ ᱟᱨ ᱮ ᱜᱮᱨᱮᱫ ᱛᱮᱦᱮᱸᱫ ᱾ ᱥᱟᱦᱟᱥ ᱥᱟᱧᱪᱟᱣ ᱠᱟᱛᱮ ᱟᱡ ᱥᱩᱨ ᱤᱧ ᱪᱟᱞᱟᱣ ᱮᱱᱟ, ᱧᱮᱞᱟᱹᱧ ᱫᱚ ᱟᱡᱟᱜ ᱛᱷᱚᱯᱟ ᱨᱮ ᱠᱟᱸᱪ ᱵᱚᱞᱚ ᱟᱠᱟᱱᱟ ᱾ ᱚᱱᱟᱛᱮᱜᱮ ᱥᱮᱛᱟ ᱫᱚ ᱠᱟᱸᱭ ᱠᱟᱸᱭ ᱮ ᱨᱟᱜᱮᱫ ᱛᱟᱦᱮᱸᱫᱚᱜ, ᱡᱟᱦᱟᱸᱱᱟᱜ ᱚᱥᱟᱹᱜᱩᱱ ᱠᱷᱟᱹᱛᱤᱨ ᱫᱚ ᱵᱟᱝ ᱾ ᱠᱟᱸᱪ ᱤᱧ ᱚᱪᱚᱜ ᱠᱟᱫ ᱠᱷᱟᱱ ᱚᱠᱟ ᱥᱮᱫ ᱪᱚᱭ ᱧᱤᱨ ᱮᱱᱟ ᱾''

ᱵᱟᱥᱚᱱᱛᱤ ᱟᱜ ᱵᱤᱥᱠᱩᱴ

             ᱢᱤᱫᱴᱟᱝ ᱵᱤᱥᱠᱩᱴ ᱯᱟᱠᱮᱴ ᱟᱨ ᱢᱤᱫᱴᱟᱝ ᱯᱟᱛᱷᱟᱢ ᱮ ᱠᱤᱨᱤᱧ ᱠᱮᱫ ᱛᱮ ᱛᱟᱺᱜᱤ ᱵᱟᱹᱠᱷᱩᱞ ᱥᱮᱫ ᱮ ᱛᱟᱲᱟᱢ ᱠᱮᱫ ᱟ ᱵᱟᱥᱚᱱᱛᱤ ᱾ ᱢᱤᱫᱴᱟᱝ ᱠᱚᱲᱟᱭ ᱫᱩᱲᱩᱵ ᱞᱮᱱ ᱢᱟᱹᱪᱤ ᱥᱩᱨ ᱨᱮ ᱫᱩᱲᱩᱵ ᱠᱟᱛᱮ ᱯᱟᱛᱷᱟᱢ ᱯᱟᱲᱦᱟᱣ ᱮ ᱮᱦᱚᱵ ᱠᱮᱫᱟ ᱾ ᱱᱟᱥᱮ ᱨᱮᱸᱜᱮᱡ ᱞᱮᱫᱮ ᱠᱷᱟᱹᱛᱤᱨ ᱵᱤᱥᱠᱩᱴ ᱡᱚᱢ ᱦᱚᱸᱭ ᱮᱦᱚᱵ ᱠᱮᱫᱟ ᱾ ᱟᱡ ᱡᱟᱦᱟᱸ ᱵᱤᱥᱠᱩᱴ ᱮ ᱡᱚᱢ ᱮᱫᱟ ᱟᱡ ᱥᱩᱨ ᱨᱮ ᱫᱩᱲᱩᱵ ᱞᱮᱱ ᱠᱚᱲᱟ ᱦᱚᱸ ᱚᱱᱟ ᱵᱤᱥᱠᱩᱴ ᱡᱚᱢ ᱮ ᱮᱦᱚᱵ ᱠᱮᱫᱟ ᱧᱮᱞ ᱛᱮ ᱵᱟᱥᱚᱱᱛᱤ ᱨᱟᱹᱜᱤ ᱮᱱᱟᱭ ᱾ ᱤᱠᱷᱟᱹᱱ ᱪᱮᱫ ᱦᱚᱸ ᱵᱟᱭ ᱢᱮᱱ ᱞᱮᱫᱟ ᱾ ᱵᱟᱥᱚᱱᱛᱤ ᱫᱚᱦᱲᱟ ᱵᱤᱥᱠᱩᱴ ᱮ ᱡᱚᱢ ᱠᱮᱫ ᱠᱷᱟᱱ ᱩᱱᱤ ᱠᱚᱲᱟ ᱦᱚᱸ ᱟᱨ ᱢᱤᱫᱴᱤᱡ ᱵᱤᱥᱠᱩᱴ ᱤᱫᱤ ᱠᱟᱛᱮ ᱡᱚᱢ ᱠᱮᱫᱟᱭ ᱾ 

            ᱵᱟᱥᱚᱱᱛᱤ ᱟᱨ ᱵᱟᱭ ᱥᱟᱢᱵᱽᱲᱟᱣ ᱫᱟᱲᱮᱭᱟᱫ ᱛᱮ ᱮᱜᱮᱨ ᱮ ᱮᱦᱚᱵ ᱠᱮᱫᱟ, '' ᱵᱤᱫᱷᱩᱣᱟᱹ ᱨᱟᱯᱟᱜ ᱜᱮᱞ ᱴᱟᱠᱟ ᱛᱮ ᱢᱤᱫᱴᱟᱝ ᱵᱤᱥᱠᱩᱴ ᱯᱟᱠᱮᱴ ᱵᱟᱭ ᱠᱤᱨᱤᱧ ᱫᱟᱲᱮᱭᱟᱜ ᱠᱟᱱᱟ, ᱦᱚᱲ ᱠᱤᱨᱤᱧᱟᱜ ᱵᱤᱥᱠᱩᱴ ᱮ ᱡᱚᱢ ᱮᱫᱟ ᱾'' ᱩᱱᱤ ᱠᱚᱲᱟ ᱫᱚ ᱪᱮᱫ ᱵᱚᱸ ᱵᱟᱝ ᱢᱮᱱ ᱠᱟᱛᱮ ᱢᱟᱬᱟᱝ ᱞᱮᱠᱟ ᱜᱮ ᱵᱤᱥᱠᱩᱴ ᱡᱚᱢ ᱮ ᱪᱷᱩᱴᱟᱹᱣ ᱮᱱᱟ ᱾ 

          ᱢᱩᱪᱟᱹᱫ ᱨᱮ ᱟᱨ ᱢᱤᱫᱴᱤᱡ ᱵᱤᱥᱠᱩᱴ ᱥᱟᱨᱮᱡ ᱮᱱᱟ ᱾ ᱠᱚᱲᱟ ᱫᱚ ᱚᱱᱟ ᱵᱤᱥᱠᱩᱴ ᱠᱮᱪᱟᱜ ᱠᱟᱛᱮ ᱢᱤᱫ ᱠᱮᱪᱟᱜ ᱮ ᱡᱚᱢ ᱠᱮᱫ ᱟ, ᱟᱨ ᱢᱤᱫ ᱠᱮᱪᱟᱜ ᱫᱚ ᱚᱱᱰᱮ ᱜᱮ ᱫᱚᱦᱚ ᱠᱟᱫ ᱟᱭ ᱾ ᱵᱟᱥᱚᱱᱛᱤ ᱫᱚ ᱠᱮᱪᱟᱜ ᱵᱤᱥᱠᱩᱴ ᱵᱟᱝ ᱡᱚᱢ ᱠᱟᱛᱮ ᱮᱜᱮᱨ ᱮᱜᱮᱨ ᱛᱮ ᱚᱱᱰᱮ ᱠᱷᱚᱱ ᱮ ᱥᱟᱦᱟ ᱮᱱᱟ ᱾ 

              ᱩᱰᱟᱹᱱ ᱜᱟᱹᱰᱤ ᱦᱮᱡ ᱮᱱᱟ ᱾ ᱩᱰᱟᱹᱱ ᱜᱟᱹᱰᱤ ᱨᱮ ᱫᱮᱡ ᱠᱟᱛᱮ ᱵᱟᱥᱚᱱᱛᱤ ᱯᱟᱛᱷᱟᱢ ᱵᱮᱜᱽ ᱨᱮ ᱥᱟᱢᱵᱟᱣ ᱡᱷᱚᱜ ᱮ ᱧᱮᱞ ᱠᱮᱫ ᱟ, ᱟᱡᱟᱜ ᱵᱤᱥᱠᱩᱴ ᱫᱚ ᱵᱮᱜᱽ ᱨᱮᱜᱮ ᱢᱮᱱᱟᱜ-ᱟ ᱾ ᱩᱱᱤ ᱠᱚᱲᱟ ᱦᱟᱜ ᱵᱤᱥᱠᱩᱴ ᱜᱮ ᱡᱚᱢ ᱠᱟᱛᱮ ᱥᱚᱠᱛᱚᱭ ᱮᱜᱮᱨ ᱚᱴᱚ ᱟᱠᱟᱫᱮᱭᱟ ᱾ ᱩᱱᱤ ᱠᱚᱲᱟ ᱴᱷᱮᱱ ᱥᱮᱱ ᱠᱟᱛᱮ ᱤᱠᱟᱹ ᱠᱚᱭ ᱥᱟᱱᱟ ᱠᱮᱫᱮᱭᱟ ᱵᱟᱥᱚᱱᱛᱤ, ᱤᱠᱷᱟᱹᱱ ᱤᱱᱟᱹᱜ ᱛᱮᱫᱚ ᱩᱰᱟᱹᱱ ᱜᱟᱹᱰᱤ ᱨᱚᱱᱣᱮ ᱨᱮ ᱫᱟᱹᱲ ᱮ ᱮᱦᱚᱵ ᱞᱮᱫ ᱛᱟᱦᱮᱸᱫ ᱾ 

ᱡᱟᱱᱟᱝ

              ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛ ᱢᱩᱨᱢᱩᱣᱟᱜ ᱨᱚᱱᱚᱲ ᱯᱩᱛᱷᱤ ᱞᱮᱠᱟᱛᱮ ᱡᱤᱣᱤᱭᱟᱱ, ᱵᱤᱱ ᱡᱤᱣᱤᱭᱟᱱ ᱚᱠᱚᱭ ᱠᱚᱫᱚ ᱠᱚᱲᱟ ᱡᱟᱝ, ᱚᱠᱚᱭ ᱠᱚᱫᱚ ᱠᱩᱲᱤ ᱡᱟᱝ, ᱚᱠᱚᱭ ᱠᱚᱫᱚ ᱚᱠᱟ ᱡᱟᱝ ᱦᱚᱸ ᱵᱟᱝ ᱟᱨ ᱚᱠᱚᱭ ᱠᱚᱫᱚ ᱵᱟᱱᱟᱨ ᱡᱟᱝ ᱨᱮᱭᱟᱜ ᱠᱟᱱᱟ ᱢᱮᱱᱛᱮ ᱡᱟᱦᱟᱸ ᱟᱹᱲᱟᱹ ᱠᱷᱚᱱ ᱵᱟᱰᱟᱭᱚᱜᱼᱟ ᱚᱱᱟ ᱜᱮ ᱡᱟᱱᱟᱝ  ᱵᱚ ᱢᱮᱛᱟᱜ ᱠᱟᱱᱟ ᱾ ᱥᱟᱱᱛᱟᱲ ᱯᱟᱹᱨᱥᱤ ᱨᱮ ᱡᱟᱱᱟᱝ ᱫᱚ ᱯᱩᱱ ᱛᱷᱚᱠ ᱨᱮ ᱦᱟᱹᱴᱤᱧ ᱟᱠᱟᱱᱟ ᱾

᱑. ᱠᱚᱲᱟ ᱡᱟᱱᱟᱝ 

ᱠᱚᱲᱟᱭ ᱵᱩᱡᱷᱟᱹᱣ ᱚᱪᱚ ᱠᱚ ᱟᱹᱲᱟᱹ ᱫᱚ ᱠᱚᱲᱟ ᱡᱟᱱᱟ' ᱵᱚ ᱢᱮᱛᱟᱜ ᱠᱟᱱᱟ, ᱡᱮᱢᱚᱱ- ᱨᱟᱡᱟ, ᱠᱩᱢᱟᱹᱝ, ᱵᱟᱵᱟ, ᱠᱟᱠᱟ, ᱫᱟᱫᱟ, ᱥᱟᱺᱰᱤ, ᱵᱚᱫᱟ, ᱵᱷᱟᱹᱴᱩ, ᱫᱟᱢᱠᱚᱢ ᱮᱢᱟᱱ ᱾

᱒. ᱠᱩᱲᱤ ᱡᱟᱱᱟᱝ

ᱡᱟᱦᱟᱸ ᱟᱹᱲᱟᱹ ᱠᱩᱲᱤ ᱵᱩᱡᱷᱟᱹᱣ ᱚᱪᱚ ᱠᱚᱣᱟ ᱚᱱᱟ ᱫᱚ ᱠᱩᱲᱤ ᱡᱟᱱᱟᱝ ᱵᱚ ᱢᱮᱛᱟᱜᱼᱟ, ᱡᱮᱢᱚᱱ- ᱨᱟᱹᱱᱤ, ᱦᱟᱛᱚᱢ, ᱟᱭᱳ, ᱠᱟᱹᱠᱤ, ᱫᱟᱹᱭ, ᱠᱟᱞᱚᱴ, ᱯᱟᱹᱴᱷᱤ, ᱵᱷᱩᱞᱤ, ᱯᱮᱴᱷᱟᱬ ᱮᱢᱟᱱ᱾

᱓. ᱦᱟᱫ ᱡᱟᱱᱟᱝ 

ᱡᱟᱦᱟᱸ ᱠᱚᱲᱟ ᱡᱟᱱᱟᱝ ᱪᱮ ᱠᱩᱲᱤ ᱡᱟᱱᱟᱝ ᱚᱠᱟ ᱦᱚᱸ ᱵᱟᱭ ᱵᱩᱡᱷᱟᱹᱣ ᱚᱪᱚᱭᱟ, ᱚᱱᱟ ᱫᱚ ᱦᱟᱫ ᱡᱟᱱᱟᱝ ᱵᱚ ᱢᱮᱛᱟᱜᱼᱟ, ᱡᱮᱢᱚᱱ- ᱫᱷᱤᱨᱤ, ᱫᱟᱨᱮ, ᱦᱟᱯᱟ, ᱚᱲᱟᱜ, ᱵᱩᱨᱩ ᱮᱢᱟᱱ ᱾

᱔. ᱡᱟᱹᱛ ᱡᱟᱱᱟᱝ

ᱡᱟᱦᱟᱸ ᱟᱹᱲᱟᱹ ᱠᱚᱲᱟ ᱡᱟᱱᱟᱝ ᱟᱨ ᱠᱩᱲᱤ ᱡᱟᱱᱟᱝ ᱵᱟᱱᱟᱨ ᱜᱮ ᱵᱩᱡᱷᱟᱹᱣ ᱚᱪᱚᱭᱟ ᱚᱱᱟ ᱫᱚ ᱡᱟᱹᱛ ᱡᱟᱱᱟᱝ ᱵᱚ ᱢᱮᱛᱟᱜᱼᱟ, ᱡᱮᱢᱚᱱ- ᱥᱟᱸᱜᱟᱛ, ᱜᱚᱲᱚᱢ, ᱜᱤᱫᱽᱨᱟᱹ, ᱢᱤᱦᱩᱸ, ᱵᱩᱥᱟᱹᱜ ᱮᱢᱟᱱ ᱾ 

ᱨᱟᱡᱽᱢᱟᱹᱱᱤ ᱟᱜ ᱨᱟᱹᱦᱱᱤ

 ᱚᱠᱟ ᱨᱮᱧ ᱞᱟᱹᱭᱟ, ᱚᱠᱚᱭᱤᱧ ᱞᱟᱹᱭᱟᱭ

ᱚᱱᱛᱚᱨ ᱢᱚᱱᱮ ᱨᱮᱭᱟᱜ ᱠᱟᱛᱷᱟ ᱜᱚᱭ?

ᱛᱤᱥ ᱨᱮᱪᱚ ᱩᱱᱤᱧ ᱫᱩᱞᱟᱹᱲ ᱠᱮᱫᱮ; ᱤᱧᱢᱟ- 

ᱛᱷᱤᱛ ᱦᱚᱸ ᱵᱟᱹᱧ ᱛᱷᱤᱛ ᱟᱱ ᱜᱚᱭ ᱾

ᱜᱩᱛᱤ ᱠᱟᱱ ᱨᱮᱦᱚᱸᱭ ᱨᱟᱯᱟᱡᱽ'ᱤᱡ; ᱤᱧᱟᱜ- 

ᱜᱟᱹᱦᱤᱨ ᱚᱱᱛᱚᱨ ᱛᱮ ᱵᱚᱞᱚ ᱮᱱᱟᱭ ᱾

ᱞᱚᱜ ᱦᱩᱭᱩᱜ ᱨᱮᱦᱚᱸ ᱦᱩᱨᱩᱢ ᱥᱮᱝᱜᱮᱞ ᱨᱮ 

ᱞᱚᱴᱚ ᱡᱟᱹᱱᱩᱢ ᱨᱮ ᱦᱩᱭᱩᱜ ᱨᱮᱦᱚᱸ ᱜᱤᱛᱤᱡ ᱾ 

ᱟᱡ ᱜᱮ ᱤᱧ ᱫᱚᱸᱧ ᱫᱩᱞᱟᱹᱲ ᱮᱭᱟ 

ᱟᱡ ᱵᱮᱜᱤᱚᱨ ᱚᱦᱚᱸᱧ ᱛᱟᱦᱮᱸ ᱠᱮᱭᱟ ᱾  

ᱠᱷᱤᱞᱰᱩ ᱮᱱᱮᱡ ᱟᱹᱧ ᱟᱡ ᱥᱟᱶ 

ᱠᱤᱥᱟᱹᱬ ᱨᱮᱸᱜᱮᱡ ᱫᱚ ᱵᱟᱹᱧ ᱵᱟᱛᱟᱣ ᱾

ᱡᱟᱭ ᱡᱩᱜᱽ ᱤᱧ ᱛᱟᱦᱮᱸᱱ ᱟᱡ ᱥᱟᱞᱟᱜ 

ᱡᱤᱣᱤᱫ ᱡᱤᱵᱚᱱ ᱨᱮᱦᱚᱸ ᱜᱩᱨ ᱛᱟᱭᱚᱢ ᱦᱚᱸ ᱾ 

ᱢᱮᱱᱟᱹᱧ ᱨᱮᱦᱚᱸ ᱤᱧ ᱮᱥᱠᱟᱨ ᱜᱮ 

ᱢᱚᱱᱮ ᱫᱚ ᱢᱮᱱᱟᱜ ᱟᱡ ᱥᱟᱶ ᱨᱮ ᱾

ᱤᱧ ᱫᱚ ᱩᱱᱤᱧ ᱥᱤᱵᱤᱞ ᱟᱠᱟᱣᱟᱫ ᱫᱮᱭᱟ 

ᱤᱱᱤ ᱫᱚ ᱛᱤᱥ ᱦᱚᱸ ᱵᱟᱹᱧ ᱦᱤᱲᱤᱧ ᱠᱮᱭᱟ ᱾

ᱥᱟᱭ ᱡᱚᱱᱚᱢ ᱟᱡ ᱥᱟᱶᱤᱧ ᱛᱟᱦᱮᱸᱱ ᱾ ᱚᱦᱚᱧ- 

ᱥᱟᱦᱟᱣ ᱠᱮᱭᱟ ᱟᱡ ᱠᱷᱚᱱ ᱪᱷᱩᱰᱟᱹᱨᱚᱜ ᱾

ᱦᱩᱠᱩᱢ ᱠᱮᱫ-ᱟᱭ ᱠᱤᱥᱠᱩ ᱨᱟᱯᱟᱡᱽ 

ᱦᱩᱭᱟᱫ ᱢᱮᱭᱟ ᱫᱚᱞᱟᱱ ᱵᱟᱹᱜᱤ ᱾

ᱧᱟᱯᱟᱢ ᱚᱱᱟ ᱛᱟᱭᱚᱢ ᱵᱟᱭ ᱦᱩᱭ ᱟᱠᱟᱱ 

ᱧᱩᱛᱟᱹᱛ ᱜᱮ ᱱᱚᱶᱟ ᱫᱷᱟᱹᱨᱛᱤ ᱧᱮᱞᱚᱜ ᱠᱟᱱ ᱾

ᱨᱟᱭᱵᱟᱨᱚᱜ ᱢᱮᱥᱮ ᱮ ᱦᱮᱸᱫᱮ ᱨᱤᱢᱤᱞ 

ᱨᱟᱲᱮᱡ ᱜᱚᱫᱽ ᱢᱮ ᱡᱤᱣᱤ ᱛᱟᱹᱞᱤᱧ ᱾

ᱩᱥᱩᱞ ᱵᱩᱨᱩ ᱞᱚᱜ ᱦᱚᱲ ᱠᱚ ᱧᱮᱞᱟ 

ᱩᱠᱩ ᱚᱱᱛᱚᱨ ᱞᱚᱜ ᱚᱠᱚᱭ ᱮ ᱧᱮᱞᱟ?

ᱪᱮᱠᱟᱭᱟᱢ ᱪᱚᱨᱚᱠ ᱯᱟᱠᱟ ᱫᱚᱞᱟᱱ 

ᱪᱮᱠᱟᱭᱟᱢ ᱥᱚᱱᱟ ᱢᱚᱛᱤ ᱦᱤᱨᱟᱹ? 

ᱫᱩᱞᱟᱹᱲ ᱜᱟᱛᱮ ᱡᱩᱫᱤ ᱵᱟᱭ ᱧᱟᱢᱚᱜ 

ᱫᱩᱠ ᱫᱚ ᱪᱮᱠᱟᱛᱮ ᱦᱟᱭᱨᱮ ᱥᱟᱦᱟᱜ? 

ᱮᱠᱞᱟ ᱜᱮᱧ ᱵᱩᱡᱷᱟᱹᱣ ᱦᱚᱲ ᱜᱷᱩᱲ ᱨᱮᱦᱚᱸ 

ᱮᱥᱠᱟᱨ ᱜᱮᱧ ᱟᱴᱠᱟᱨ ᱫᱚᱞᱟᱱ ᱨᱮᱦᱚᱸ ᱾

ᱯᱮᱨᱮᱡ ᱛᱷᱟᱹᱨᱤ ᱡᱚ ᱵᱤᱞᱤ, ᱛᱚᱣᱟ ᱫᱟᱠᱟ 

ᱯᱟᱥᱟᱜ ᱜᱮ ᱵᱩᱡᱷᱟᱹᱜ ᱜᱟᱛᱮ ᱵᱤᱱᱟᱹ ᱾

ᱰᱟᱱᱴᱟ ᱫᱟᱥᱟᱸᱭ, ᱨᱟᱡᱽ ᱱᱟᱹᱪᱱᱤ ᱮᱱᱮᱡ

ᱰᱚᱸᱰᱮᱠ ᱦᱚᱸ ᱵᱟᱭ ᱧᱮᱞ ᱥᱟᱜᱱᱟ ᱾ 

ᱱᱟᱶᱟ ᱱᱟᱶᱟ ᱫᱤᱞᱚᱝ ᱥᱟᱹᱲᱤ ᱥᱟᱭᱟ 

ᱱᱟᱶᱟ ᱥᱚᱱᱟ ᱯᱷᱩᱞᱤ ᱯᱟᱜᱽᱨᱟ ᱾

ᱴᱟᱠᱟ ᱠᱟᱹᱣᱰᱤ ᱦᱚᱸ ᱠᱚᱞᱥᱟ ᱜᱤᱰᱤ ᱥᱟᱱᱟᱭ

ᱴᱚᱜ ᱧᱟᱢ ᱟᱠᱟᱫᱮᱭᱟ ᱫᱩᱞᱟᱹᱲ ᱡᱟᱦᱟᱸᱭ ᱾

ᱵᱮᱥ ᱜᱮ ᱵᱟᱭ ᱵᱩᱡᱷᱟᱹᱣ ᱪᱮᱫ ᱦᱚᱸ 

ᱵᱟᱹᱥ ᱜᱮ ᱚᱱᱠᱟᱱ ᱱᱚᱶᱟ ᱫᱚ ᱾᱾

ᱩᱭᱦᱟᱹᱨ

             ᱢᱤᱫᱴᱤᱡ ᱜᱟᱹᱰᱤ ᱮᱠᱥᱤᱰᱮᱱᱴ ᱛᱮ ᱡᱚᱵᱟ ᱟᱨ ᱡᱟᱹᱣᱱᱟᱹ ᱵᱟᱱᱟ ᱦᱚᱲᱟᱜ ᱞᱮᱸᱜᱟ ᱛᱤ ᱛᱟᱹᱠᱤᱱ ᱜᱮᱡᱮᱨ ᱮᱱᱟ ᱾ ᱚᱱᱟ ᱫᱚ ᱚᱯᱨᱮᱥᱚᱱ ᱠᱟᱛᱮ ᱠᱷᱟᱹᱱᱰᱨᱟᱹ ᱦᱩᱭ ᱮᱱᱟ ᱾ 

           ᱡᱚᱵᱟᱭ ᱢᱮᱱ ᱠᱮᱫ ᱟ, "ᱪᱟᱸᱫᱚ ᱵᱚᱸᱜᱟ! ᱟᱢ ᱫᱚ ᱩᱱᱟᱹᱜ ᱮᱢ ᱱᱤᱴᱷᱩᱨᱟ, ᱤᱧᱟᱜ ᱞᱮᱸᱜᱟ ᱛᱤᱢ ᱤᱫᱤ ᱠᱮᱫᱟ ᱾" ᱡᱟᱹᱣᱱᱟᱹᱭ ᱢᱮᱱ ᱠᱮᱫ ᱟ, "ᱪᱟᱸᱫᱚ ᱵᱚᱸᱜᱟ ᱤᱧ ᱫᱚᱭ ᱫᱟᱭᱟ ᱟᱹᱫᱤᱧᱟ; ᱞᱮᱸᱜᱟ ᱛᱤ ᱜᱮᱥᱮ ᱤᱫᱤ ᱠᱮᱫᱟ ᱡᱚᱡᱚᱢ ᱛᱤ ᱫᱚᱭ ᱥᱟᱨᱮᱡ ᱟᱠᱟᱣᱟᱫ ᱫᱤᱧ ᱜᱮᱭᱟ ᱾"

ᱯᱟᱹᱱᱟᱹᱦᱤ

          ᱦᱚᱲ ᱡᱚᱠᱷᱚᱱ ᱢᱩᱱᱫᱩᱨ ᱛᱮ ᱵᱚᱸᱜᱟᱜ ᱠᱚ ᱦᱤᱡᱩᱜ-ᱟ ᱵᱟᱵᱟᱭ ᱢᱮᱛᱟ ᱠᱚᱣᱟ, "ᱯᱟᱹᱱᱟᱹᱦᱤ ᱫᱚ ᱵᱟᱦᱨᱮ ᱥᱮᱫ ᱨᱮ ᱛᱩᱫ ᱠᱟᱛᱮ ᱦᱤᱡᱩᱜ ᱯᱮ ᱾" 

           ᱢᱤᱫ ᱪᱚᱨᱚᱠ, ᱪᱷᱟᱹᱰᱩᱭ ᱠᱩᱲᱤ ᱡᱚᱠᱷᱚᱱ ᱱᱚᱶᱟ ᱢᱩᱱᱫᱤᱨ ᱛᱮ ᱵᱚᱸᱜᱟᱜ ᱮ ᱦᱤᱡᱩᱜ-ᱟ ᱵᱟᱵᱟᱭ ᱢᱮᱛᱟᱭᱟ, "ᱯᱟᱹᱱᱟᱹᱦᱤ ᱫᱚ ᱵᱷᱤᱛᱨᱤ ᱥᱮᱫ ᱜᱮ ᱟᱹᱜᱩ ᱛᱟᱨᱟᱭ ᱢᱮ; ᱵᱟᱦᱨᱮ ᱠᱚᱨᱮ ᱟᱞᱚᱢ ᱫᱚᱦᱚ ᱵᱟᱲᱟᱭᱟ ᱾"