ᱢᱮᱨᱚᱢ ᱮ ᱫᱟᱹᱲᱟ
ᱰᱟᱹᱨᱤ ᱫᱟᱹᱲᱟ
ᱠᱟᱰᱟ ᱦᱚᱸᱭ ᱫᱟᱹᱲᱟ ᱾
ᱯᱩᱴᱷᱤ ᱯᱟᱭᱨᱟᱜ
ᱵᱚᱣᱟᱲ ᱮ ᱯᱟᱭᱨᱟᱜ
ᱥᱚᱞᱮ ᱦᱚᱸᱭ ᱯᱟᱭᱨᱟᱜ ᱾
ᱩᱯᱤ ᱩᱰᱟᱹᱵ
ᱞᱩᱛᱤ ᱩᱰᱟᱹᱵ
ᱪᱮᱬᱮ ᱦᱚᱸᱭ ᱩᱰᱟᱹᱵ ᱾
ᱤᱧᱤᱧ ᱫᱟᱹᱲᱟ
ᱤᱧᱤᱧ ᱯᱟᱭᱨᱟᱜ
ᱤᱧ ᱦᱚᱸᱧ ᱩᱰᱟᱹᱵ ᱾
(ᱱᱚᱶᱟ ᱚᱱᱚᱬᱦᱮᱸ ᱫᱚ ᱤᱧᱟᱜ ᱪᱟᱸᱫᱚ ᱢᱟᱢᱚ ᱯᱚᱛᱚᱵ ᱠᱷᱚᱱᱟᱜ ᱛᱩᱢᱟᱹᱞ ᱟᱠᱟᱱᱟ ᱾ )
***
ᱱᱚᱶᱟ ᱫᱚ ᱤᱧᱟᱜ ᱥᱟᱶᱦᱮᱫ ᱥᱚᱠᱲᱟ ᱠᱟᱱᱟ ᱾ ᱱᱚᱰᱮ ᱤᱧ ᱚᱱᱚᱬᱦᱮᱸ, ᱠᱟᱹᱦᱱᱤ, ᱚᱱᱚᱞ, ᱥᱤᱥᱩ ᱥᱟᱶᱦᱮᱫ, ᱡᱤᱭᱚᱱ ᱪᱩᱨᱤᱛ ᱮᱢᱟᱱ ᱠᱚᱸᱧ ᱮᱨ ᱟᱠᱟᱫᱟ ᱾ ᱚᱱᱟ ᱠᱚᱦᱚᱸ ᱚᱢᱚᱱ ᱟᱠᱟᱱ ᱛᱮ ᱩᱫ ᱞᱮᱠᱟ ᱯᱷᱩᱴᱟᱹᱣ ᱟᱠᱟᱱᱟ ᱾ ᱱᱚᱰᱮ ᱯᱮ ᱵᱚᱞᱚ ᱩᱛᱟᱹᱨ ᱟᱠᱟᱱ ᱠᱷᱟᱱ ᱫᱚ ᱢᱟ ᱩᱭᱩᱝ ᱛᱚᱨᱟᱭ ᱯᱮ ᱾
ᱞᱤᱞ ᱥᱮᱨᱢᱟ
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱦᱩᱲᱩ ᱨᱮ
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱤᱲᱤ ᱨᱮ ᱾
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱥᱟᱹᱲᱤᱢ ᱨᱮ
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱪᱟᱛᱚᱢ ᱨᱮ ᱾
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱵᱩᱨᱩ ᱨᱮ
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱰᱟᱹᱦᱤ ᱨᱮ ᱾
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱫᱚᱨᱭᱟ ᱨᱮ
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱜᱟᱰᱟ ᱨᱮ ᱾
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱡᱟᱹᱲᱤ ᱢᱮ ᱜᱚᱴᱟ ᱜᱮ
ᱞᱤᱞ ᱥᱮᱨᱢᱟ ᱞᱤᱞ ᱥᱮᱨᱢᱟ
ᱟᱞᱚᱢ ᱡᱟᱹᱲᱤ ᱤᱧ ᱪᱮᱛᱟᱱ ᱨᱮ ᱾
(ᱱᱚᱶᱟ ᱚᱱᱚᱬᱦᱮᱸ ᱫᱚ ᱤᱧᱟᱜ ᱪᱟᱸᱫᱚ ᱢᱟᱢᱚ ᱯᱚᱛᱚᱵ ᱠᱷᱚᱱᱟᱜ ᱛᱩᱢᱟᱹᱞ ᱟᱠᱟᱱᱟ ᱾ )
***
ᱢᱮᱱᱮᱜ ᱢᱮᱱᱮᱜ ᱢᱮᱨᱚᱢ
ᱢᱮᱱᱮᱜ ᱢᱮᱱᱮᱜ ᱢᱮᱨᱚᱢ
ᱢᱮᱱᱮᱜ ᱢᱮᱨᱚᱢ ᱦᱚᱯᱚᱱ
ᱤᱧ ᱥᱩᱨ ᱛᱮ ᱦᱤᱡᱩᱜ ᱵᱤᱱ
ᱵᱟᱞᱮ ᱜᱟᱥ ᱤᱧ ᱮᱢᱟ ᱵᱤᱱ ᱾
ᱢᱮᱱᱮᱜ ᱢᱮᱱᱮᱜ ᱢᱮᱨᱚᱢ
ᱢᱮᱱᱮᱜ ᱢᱮᱨᱚᱢ ᱦᱚᱯᱚᱱ
ᱤᱧ ᱥᱩᱨ ᱛᱮ ᱦᱤᱡᱩᱜ ᱵᱤᱱ
ᱢᱟᱺᱰᱤ ᱫᱟᱜ ᱤᱧ ᱮᱢᱟ ᱵᱤᱱ ᱾᱾
(ᱱᱚᱶᱟ ᱚᱱᱚᱬᱦᱮᱸ ᱫᱚ ᱤᱧᱟᱜ ᱪᱟᱸᱫᱚ ᱢᱟᱢᱚ ᱯᱚᱛᱚᱵ ᱠᱷᱚᱱᱟᱜ ᱛᱩᱢᱟᱹᱞ ᱟᱠᱟᱱᱟ ᱾)
***
ᱛᱩᱲᱩᱠ ᱥᱟᱶ ᱛᱩᱯᱩᱫ
ᱚᱦᱟᱭ ᱵᱟᱪᱷᱟ ᱨᱮ ᱞᱟᱹᱭᱟᱹᱧ ᱚᱠᱟᱨᱮ
ᱚᱠᱚᱭ ᱮ ᱟᱧᱡᱚᱢᱟ ᱛᱮᱞᱟᱭᱟᱭ ᱚᱠᱚᱭ?
ᱛᱤᱨᱤ ᱡᱩᱨᱤ ᱠᱤᱱ ᱵᱟᱯᱟᱜᱽ ᱠᱟᱱ
ᱛᱮᱧᱟᱝ ᱫᱟᱹᱭ ᱠᱤᱱ ᱛᱟᱯᱟᱢ ᱠᱟᱱ ᱾
ᱜᱤᱫᱟᱹᱨ ᱠᱚ ᱨᱟᱹᱵᱩᱲ ᱨᱟᱯᱟᱪᱟᱜ ᱠᱟᱱ
ᱜᱚᱵᱟ ᱜᱚᱭᱳ ᱠᱤᱱ ᱵᱚᱠᱚᱨ ᱵᱚᱠᱚᱨᱚᱜ ᱠᱟᱱ ᱾
ᱟᱭᱳ ᱵᱟᱵᱟ ᱜᱮ ᱦᱟᱺᱰᱤ ᱨᱮ ᱡᱚᱵᱮ
ᱟᱨ ᱜᱤᱫᱟᱹᱨ ᱵᱮᱥ ᱮ ᱛᱟᱦᱮᱸᱱ ᱚᱠᱟᱨᱮ ᱾
ᱠᱤᱥᱠᱩ ᱨᱟᱯᱟᱡᱽ ᱮ ᱵᱟᱹᱜᱤᱭᱟᱫ ᱨᱟᱡᱽ
ᱠᱤᱥᱟᱹᱬ ᱢᱟᱹᱨᱰᱤ ᱦᱩᱭᱮᱱ ᱨᱮᱝᱜᱮᱡ ᱾
ᱡᱟᱞᱟᱫ ᱡᱟᱯᱟᱫ ᱮ ᱫᱟᱲᱟᱱ ᱴᱩᱰᱩ ᱨᱩᱥᱤᱠᱟ
ᱡᱟᱣ ᱞᱮᱠᱟ ᱯᱟᱹᱪᱩᱜ ᱨᱚᱢᱚᱡᱽ ᱨᱟᱹᱥᱠᱟᱹ ᱾
ᱢᱩᱨᱢᱩ ᱵᱚᱸᱜᱟ ᱫᱮᱵᱟ ᱥᱮᱵᱟᱭ ᱵᱟᱹᱜᱤ ᱠᱮᱫ
ᱢᱟᱨᱟᱝ ᱦᱟᱺᱥᱫᱟᱜ ᱵᱤᱪᱟᱹᱨ ᱟᱪᱟᱨ ᱮ ᱵᱟᱹᱜᱤᱭᱟᱫ ᱾
ᱤᱧ ᱦᱚᱸ ᱵᱟᱹᱱᱤᱡᱽ ᱵᱮᱯᱟᱨ ᱤᱧ ᱵᱟᱹᱜᱤ ᱠᱮᱫ
ᱤᱱᱟᱹ ᱛᱟᱭᱚᱢ ᱡᱚᱛᱚ ᱦᱚᱲ ᱵᱷᱮᱯᱮᱜᱮᱫ ᱾
ᱥᱚᱨᱮᱱ ᱞᱟᱹᱲᱦᱟᱹᱭ ᱮ ᱵᱷᱟᱜᱟᱣᱮᱱ
ᱥᱟᱱᱟᱢ ᱵᱚ ᱵᱷᱟᱝᱜᱚᱲ ᱪᱟᱵᱟᱭᱮᱱ ᱾
ᱦᱟᱦᱟ! ᱞᱟᱸᱫᱟ ᱟᱛᱮ ᱛᱩᱲᱩᱠ ᱠᱚ ᱥᱮᱴᱮᱨᱮᱱ
ᱦᱟᱭᱨᱮ ᱟᱵᱚ ᱫᱚᱵᱚ ᱥᱟᱥᱚᱱ ᱚᱪᱚᱭᱮᱱ ᱾
ᱧᱤᱨ ᱮᱱᱟ ᱵᱚ ᱦᱟᱱᱛᱮ ᱱᱷᱟᱛᱮ
ᱧᱩᱛᱟᱹᱛ ᱜᱚᱝᱜᱷᱚᱨ ᱨᱮ ᱩᱠᱩᱭᱮᱱ ᱚᱠᱚᱭ ᱾
ᱨᱟᱜ ᱨᱚᱫᱷᱚᱱ ᱛᱮ ᱫᱤᱥᱚᱢ ᱟᱸᱫᱚᱲᱮᱱ
ᱨᱮᱜᱟ ᱛᱩᱲᱩᱠ ᱵᱟᱠᱚ ᱫᱟᱭᱟ ᱞᱮᱱ ᱾
ᱩᱭᱦᱟᱹᱨᱚᱜ ᱠᱟᱱᱟᱹᱧ ᱤᱧ ᱫᱚ
ᱩᱱᱡᱷᱚᱜ ᱵᱟᱵᱚ ᱵᱷᱟᱝᱜᱚᱲ ᱠᱚᱜ ᱠᱷᱟᱱ ᱾
ᱪᱮᱝᱜᱷᱟ ᱪᱤᱨᱜᱟᱹᱞ ᱵᱚ ᱛᱟᱦᱮᱸ ᱠᱚᱜ ᱠᱷᱟᱱ
ᱪᱤᱞᱤ ᱦᱚᱸ ᱵᱟᱠᱚ ᱪᱮᱠᱟ ᱠᱮᱵᱚ ᱦᱩᱱᱟᱹᱝ ᱾
ᱫᱷᱚᱨᱢᱚ ᱜᱚᱥᱟᱸᱭ ᱵᱚ ᱦᱤᱲᱤᱧ ᱠᱮᱫᱮ
ᱫᱩᱠ ᱢᱟ ᱦᱮᱡᱟᱫ ᱵᱚᱱ ᱚᱱᱟ ᱛᱮᱜᱮ ᱾
ᱮᱲᱮ ᱮᱯᱮᱲᱮ ᱭᱮᱱ ᱵᱚ ᱟᱵᱚ ᱜᱮ
ᱮᱲᱮ ᱚᱪᱚᱭᱮᱱ ᱵᱚ ᱡᱷᱚᱛᱚ ᱚᱱᱟᱛᱮ ᱾
ᱯᱷᱮᱰᱟᱛ ᱟᱵᱚ ᱜᱮᱵᱚ ᱢᱚᱥᱨᱟ ᱠᱮᱫ
ᱯᱚᱥᱲᱟ ᱚᱲᱚᱜ ᱦᱚᱨ ᱵᱚ ᱛᱮᱭᱟᱨ ᱠᱮᱫ ᱾
ᱰᱷᱮᱥᱟ ᱰᱷᱤᱥᱤ ᱮᱱ ᱵᱚ ᱟᱵᱚ ᱜᱮ
ᱰᱷᱚᱰᱟ ᱨᱮ ᱵᱚ ᱧᱩᱨᱮᱱ ᱚᱱᱛᱮ ᱾
ᱱᱮᱭᱟᱶ ᱛᱟᱯᱟᱢ ᱵᱚ ᱠᱩᱥᱤᱭᱟᱫ
ᱱᱤᱛ ᱚᱱᱟᱛᱮ ᱡᱟᱞᱟᱫ ᱡᱟᱯᱟᱫ ᱾
ᱴᱚᱞᱟ ᱫᱤᱥᱚᱢ ᱵᱚ ᱵᱟᱹᱲᱤᱡ ᱠᱮᱫ
ᱴᱚᱦᱚᱞ ᱵᱤᱠᱚᱞ ᱚᱱᱟᱛᱮ ᱟᱹᱲᱤᱡ ᱛᱮᱫ ᱾
ᱵᱚᱦᱚᱜ ᱨᱮ ᱵᱩᱫᱷᱤ ᱵᱚᱞᱚᱣᱟᱫ ᱵᱚ
ᱵᱟᱵᱚ ᱵᱟᱹᱲᱤᱡᱚᱜ ᱛᱤᱥ ᱦᱚᱸ ᱟᱫᱚ ᱾᱾
(ᱱᱚᱶᱟ ᱚᱱᱚᱬᱦᱮᱸ ᱫᱚ ᱤᱧᱟᱜ ᱡᱟᱹᱦᱤᱨᱟᱹᱝᱜᱤ ᱯᱚᱛᱚᱵ ᱠᱷᱚᱱᱟᱜ ᱛᱩᱢᱟᱹᱞ ᱟᱠᱟᱱᱟ ᱾)
***
Subscribe to:
Posts (Atom)
ᱵᱟᱪᱷᱟᱣ ᱚᱞ
ᱯᱟᱨᱠᱚᱢ ᱮ ᱜᱤᱛᱤᱡ ᱟᱠᱟᱱ
ᱤᱧᱤᱧ ᱵᱤᱞ ᱟᱠᱟᱱ ᱯᱟᱨᱠᱚᱢ ᱮ ᱜᱤᱛᱤᱡ ᱟᱠᱟᱱ ᱾ ᱑ ᱤᱧ ᱪᱮᱛᱟᱱ ᱨᱮ ᱦᱟᱥᱟ, ᱫᱷᱤᱨᱤ ᱠᱚ ᱟᱴᱮᱫ ᱟᱠᱟᱱ ᱚᱱᱟ ᱪᱮᱛᱟᱱ ᱨᱮ ᱯᱟᱨᱠᱚᱢ ᱮ ᱜᱤᱛᱤᱡ ᱟᱠᱟᱱ ᱾ ᱒ ᱤᱧ ᱫᱚᱸᱧ ᱞᱟᱛᱟᱨ ᱟᱠᱟᱱ ᱯᱟᱨᱠᱚᱢ...
ᱵᱟᱹᱲᱛᱤ ᱧᱮᱞ ᱟᱠᱟᱱ ᱯᱚᱥᱴ
-
ᱫᱩᱠ ᱫᱚ ᱫᱚᱨᱭᱟ ᱠᱟᱱᱟ ᱚᱱᱟ ᱯᱟᱭᱨᱟ ᱯᱟᱨᱚᱢ ᱢᱮ ᱚᱱᱟᱢ ᱯᱟᱭᱨᱟ ᱯᱟᱨᱚᱢ ᱞᱮᱠᱷᱟᱱ ᱧᱟᱢᱟᱢ ᱥᱩᱠ ᱨᱮᱭᱟᱜ ᱥᱟᱹᱢᱩᱫᱽ ᱾ ᱫᱩᱠ ᱫᱚ ᱵᱩᱨᱩ ᱠᱟᱱᱟ ᱚᱱᱟ ᱛᱟᱲᱟᱢ ᱯᱟᱨᱚᱢ ᱢᱮ ᱚᱱᱟᱢ ᱛᱟᱲᱟᱢ...