ᱱᱚᱶᱟ ᱫᱚ ᱤᱧᱟᱜ ᱥᱟᱶᱦᱮᱫ ᱥᱚᱠᱲᱟ ᱠᱟᱱᱟ ᱾ ᱱᱚᱰᱮ ᱤᱧ ᱚᱱᱚᱬᱦᱮᱸ, ᱠᱟᱹᱦᱱᱤ, ᱚᱱᱚᱞ, ᱥᱤᱥᱩ ᱥᱟᱶᱦᱮᱫ, ᱡᱤᱭᱚᱱ ᱪᱩᱨᱤᱛ ᱮᱢᱟᱱ ᱠᱚᱸᱧ ᱮᱨ ᱟᱠᱟᱫᱟ ᱾ ᱚᱱᱟ ᱠᱚᱦᱚᱸ ᱚᱢᱚᱱ ᱟᱠᱟᱱ ᱛᱮ ᱩᱫ ᱞᱮᱠᱟ ᱯᱷᱩᱴᱟᱹᱣ ᱟᱠᱟᱱᱟ ᱾ ᱱᱚᱰᱮ ᱯᱮ ᱵᱚᱞᱚ ᱩᱛᱟᱹᱨ ᱟᱠᱟᱱ ᱠᱷᱟᱱ ᱫᱚ ᱢᱟ ᱩᱭᱩᱝ ᱛᱚᱨᱟᱭ ᱯᱮ ᱾
ᱤᱧᱤᱧ ᱵᱤᱞ ᱟᱠᱟᱱ
ᱯᱟᱨᱠᱚᱢ ᱮ ᱜᱤᱛᱤᱡ ᱟᱠᱟᱱ ᱾ ᱑
ᱤᱧ ᱪᱮᱛᱟᱱ ᱨᱮ ᱦᱟᱥᱟ,
ᱫᱷᱤᱨᱤ ᱠᱚ ᱟᱴᱮᱫ ᱟᱠᱟᱱ
ᱚᱱᱟ ᱪᱮᱛᱟᱱ ᱨᱮ ᱯᱟᱨᱠᱚᱢ ᱮ ᱜᱤᱛᱤᱡ ᱟᱠᱟᱱ ᱾ ᱒
ᱤᱧ ᱫᱚᱸᱧ ᱞᱟᱛᱟᱨ ᱟᱠᱟᱱ
ᱯᱟᱨᱠᱚᱢ ᱮ ᱪᱮᱛᱟᱱ ᱟᱠᱟᱱ
ᱤᱧ ᱫᱚᱸᱧ ᱜᱚᱡ ᱟᱠᱟᱱ
ᱯᱟᱨᱠᱚᱢ ᱮ ᱡᱤᱣᱤᱫ ᱟᱠᱟᱱ ᱾ ᱓
ᱟᱫᱚ ᱡᱤᱣᱤᱫ ᱯᱟᱨᱠᱚᱢ ᱢᱟᱹᱱᱢᱤ ᱵᱟᱠᱚ ᱧᱮᱞ ᱥᱟᱦᱟᱣ ᱞᱮᱫᱮ
ᱛᱤ ᱛᱟᱭ ᱠᱚ ᱢᱟᱜ ᱨᱟᱹᱯᱩᱫ ᱠᱮᱫ
ᱟᱫᱚ ᱠᱚ ᱵᱟᱹᱜᱤ ᱚᱴᱚᱣᱟᱫ ᱞᱤᱧ ᱵᱟᱱᱟ ᱦᱚᱲ ᱾ ᱔
ᱤᱧ ᱫᱚ ᱵᱤᱞ, ᱟᱡ ᱫᱚ ᱜᱤᱛᱤᱡ
ᱟᱫᱚ ᱵᱟᱱᱟ ᱦᱚᱲ ᱞᱤᱧ ᱡᱟᱹᱯᱤᱫ ᱠᱮᱫ ᱾ ᱕
ᱤᱧ ᱫᱚ ᱮᱠᱞᱟᱹᱧ ᱮᱱᱮᱡ ᱠᱟᱱᱟ
ᱡᱚᱛᱚ ᱦᱚᱲ ᱠᱚ ᱠᱚᱭᱚᱜ ᱟᱠᱟᱫᱤᱧᱟ
ᱚᱠᱚᱭ ᱦᱚᱸ ᱵᱟᱠᱚ ᱜᱚᱲᱚᱣᱟᱹᱧ ᱠᱟᱱᱟ ᱾
ᱟᱫᱚᱢ ᱛᱤ ᱠᱚ ᱛᱷᱟᱭᱚ ᱮᱫᱟ
ᱟᱫᱚᱢ ᱠᱚ ᱥᱟᱨᱦᱟᱣ ᱤᱧ ᱠᱟᱱᱟ
ᱤᱠᱷᱟᱹᱱ ᱵᱟᱹᱲᱛᱤ ᱦᱚᱲ ᱜᱮ
ᱛᱤ ᱨᱮ ᱛᱤ ᱪᱷᱟᱸᱫᱟ ᱠᱟᱛᱮ
ᱠᱚ ᱠᱚᱭᱚᱜ ᱟᱠᱟᱫᱤᱧᱟ ᱾
ᱱᱚᱶᱟ ᱮᱱᱮᱡ ᱫᱚ
ᱤᱧ ᱥᱩᱢᱩᱝ ᱟᱜ ᱫᱚ ᱵᱟᱝ ᱠᱟᱱᱟ
ᱟᱵᱚ ᱡᱚᱛᱚ ᱦᱚᱲᱟᱜ ᱠᱟᱱᱟ
ᱫᱮᱞᱟ ᱡᱚᱛᱚ ᱦᱚᱲ ᱵᱚᱱ ᱮᱱᱮᱡ ᱟ ᱾
ᱟᱫᱚᱢ ᱫᱚ ᱮᱱᱮᱡ ᱠᱚ ᱜᱚᱲᱚᱣᱟᱹᱧ ᱠᱟᱱ ᱜᱤᱭᱟ
ᱟᱫᱚᱢ ᱠᱚ ᱨᱩ ᱮᱫᱟ ᱛᱩᱢᱫᱟᱜ
ᱟᱫᱚᱢ ᱴᱟᱢᱟᱠ, ᱟᱫᱚᱢ ᱜᱷᱩᱲᱤ,
ᱟᱫᱚᱢ ᱪᱚᱲᱪᱩᱲᱤ ᱠᱚ ᱨᱩ ᱮᱫᱟ
ᱮᱱᱛᱮ ᱨᱮᱦᱚᱸ ᱠᱚᱠᱭᱚᱜ ᱦᱚᱲᱟᱜ
ᱮᱞ ᱜᱮ ᱵᱟᱹᱲᱛᱤᱭᱟ
ᱮᱱᱮᱡ ᱦᱚᱲᱟᱜ ᱮᱞ ᱫᱚ ᱟᱹᱰᱤ ᱠᱚᱢ ᱜᱮᱭᱟ ᱾
ᱱᱚᱶᱟ ᱮᱱᱮᱡ ᱫᱚ ᱤᱧ ᱥᱩᱢᱩᱝ ᱟᱜ ᱫᱚ ᱵᱟᱝ ᱠᱟᱱᱟ
ᱟᱵᱚ ᱡᱚᱛᱚ ᱦᱚᱲᱟᱜ ᱠᱟᱱᱟ ᱾
ᱫᱮᱞᱟ ᱡᱚᱛᱚ ᱦᱚᱲ ᱵᱚᱱ ᱮᱱᱮᱡ ᱟ
ᱟᱠᱷᱲᱟ ᱵᱚᱱ ᱨᱚᱢᱚᱡᱽ ᱜᱚᱫᱟ
ᱟᱠᱷᱲᱟ ᱵᱚᱱ ᱩᱨᱜᱩᱢ ᱜᱚᱫᱟ
ᱫᱷᱩᱲᱤ ᱵᱚ ᱰᱤᱜᱽᱞᱟᱹᱣ ᱜᱚᱫᱟ ᱾
ᱧᱤᱫᱟᱹ ᱟᱜ ᱫᱮᱭᱟ ᱪᱤᱨᱟᱹ ᱠᱟᱛᱮ
ᱟᱢ ᱦᱤᱡᱩᱜ ᱢᱮ ᱾
ᱵᱤᱥᱟᱱ ᱵᱤᱧ,
ᱠᱤᱫᱤᱧ, ᱥᱮᱝᱜᱮᱞ ᱢᱟᱨᱢᱟᱨ,
ᱠᱟᱴᱠᱚᱢ ᱠᱤᱫᱤᱧ
ᱡᱚᱛᱚ ᱠᱚᱞᱥᱟ ᱜᱤᱰᱤ ᱠᱟᱛᱮ,
ᱞᱮᱵᱮᱫ ᱞᱟᱸᱰᱷᱚ ᱠᱟᱛᱮ
ᱟᱢ ᱦᱤᱡᱩᱜ ᱢᱮ
ᱤᱧ ᱫᱚ ᱟᱢᱤᱧ ᱛᱟᱺᱜᱤ ᱟᱠᱟᱫ ᱢᱮᱭᱟ ᱾
ᱰᱟᱹᱱ ᱥᱟᱶ ᱛᱟᱯᱟᱢ ᱠᱟᱛᱮ
ᱡᱩᱜᱽᱱᱤ ᱥᱟᱶ ᱧᱮᱯᱮᱫ ᱠᱟᱛᱮ
ᱩᱱᱠᱩ ᱦᱮᱨᱟᱣ ᱠᱟᱛᱮ
ᱟᱢ ᱦᱤᱡᱩᱜ ᱢᱮ
ᱤᱧ ᱫᱚ ᱟᱢᱤᱧ
ᱛᱟᱺᱜᱤ ᱟᱠᱟᱫ ᱢᱮᱭᱟ ᱾
Long time ago there lived a Cowherd in a deep Jungle. One day, after milking, he went to collect firewood. After sometime he came with firewood and saw that all the milk had been drunk up by the Cat. In anger he rushed to beat the cat. Seeing a man coming towards him with a stick, the cat ran away. Man chased him.
After being chased by Cowherd for a long time Cat managed to hide in a bush.
Before leaving the place the disappointed man said, “If I find you I will eat you up. I will even eat your fur, nail and stool as well.” Man returned. Cat listened everything.
From that day, Cat buries its stool.
ᱫᱩᱠ ᱫᱚ ᱫᱚᱨᱭᱟ ᱠᱟᱱᱟ
ᱚᱱᱟ ᱯᱟᱭᱨᱟ ᱯᱟᱨᱚᱢ ᱢᱮ
ᱚᱱᱟᱢ ᱯᱟᱭᱨᱟ ᱯᱟᱨᱚᱢ ᱞᱮᱠᱷᱟᱱ
ᱧᱟᱢᱟᱢ ᱥᱩᱠ ᱨᱮᱭᱟᱜ ᱥᱟᱹᱢᱩᱫᱽ ᱾
ᱫᱩᱠ ᱫᱚ ᱵᱩᱨᱩ ᱠᱟᱱᱟ
ᱚᱱᱟ ᱛᱟᱲᱟᱢ ᱯᱟᱨᱚᱢ ᱢᱮ
ᱚᱱᱟᱢ ᱛᱟᱲᱟᱢ ᱯᱟᱨᱚᱢ ᱞᱮᱠᱷᱟᱱ
ᱧᱟᱢᱟᱢ ᱥᱩᱠ ᱧᱩᱛᱩᱢᱟᱱ ᱥᱟᱜᱟᱲ ᱾
ᱫᱩᱠ ᱫᱚ ᱫᱟᱲᱟᱝ ᱠᱟᱱᱟ
ᱚᱱᱟ ᱛᱟᱲᱟᱢ ᱯᱟᱨᱚᱢ ᱢᱮ
ᱚᱱᱟᱢ ᱛᱟᱲᱟᱢ ᱯᱟᱨᱚᱢ ᱞᱮᱠᱷᱟᱱ
ᱧᱟᱢᱟᱢ ᱥᱩᱠ ᱨᱮᱭᱟᱜ ᱥᱚᱢᱟᱱ ᱚᱛ ᱾
ᱫᱩᱠ ᱫᱚ ᱥᱟᱫᱚᱢ ᱪᱮᱛᱟᱱ ᱛᱮ ᱦᱤᱡᱩᱜ-ᱟᱭ
ᱥᱩᱠ ᱫᱚ ᱦᱚᱨᱚ ᱪᱮᱛᱟᱱ ᱛᱮ ᱦᱤᱡᱩᱜ-ᱟᱭ
ᱤᱠᱷᱟᱹᱱ ᱨᱩᱣᱟᱹᱲ ᱡᱷᱚᱜ ᱫᱚ
ᱫᱩᱠ ᱫᱚ ᱦᱚᱨᱚ ᱪᱮᱛᱟᱱ ᱛᱮ ᱨᱩᱣᱟᱹᱲᱟᱭ
ᱥᱤᱠ ᱫᱚ ᱥᱟᱫᱚᱢ ᱪᱮᱛᱟᱱ ᱛᱮ ᱨᱩᱣᱟᱹᱲᱟᱭ ᱾
ᱫᱩᱠ ᱫᱚ ᱠᱩᱨᱰᱷᱟᱹ ᱞᱮᱠᱟ ᱦᱟᱢᱟᱞᱟ
ᱥᱩᱠ ᱫᱚ ᱛᱩᱞᱟᱹᱢ ᱞᱮᱠᱟ ᱨᱟᱣᱟᱞᱟ
ᱫᱩᱠ ᱫᱚ ᱫᱚᱨᱭᱟ ᱞᱮᱠᱟ ᱢᱟᱨᱟᱝ ᱟ
ᱥᱩᱠ ᱫᱚ ᱥᱟᱸᱠ ᱞᱮᱠᱟ ᱦᱩᱰᱤᱧᱟ ᱾
ᱫᱚᱨᱭᱟ ᱛᱟᱞᱟ ᱨᱮ
ᱥᱟᱸᱠ ᱫᱚ ᱩᱠᱩ ᱠᱟᱛᱮ ᱛᱟᱦᱮᱸ ᱠᱚᱜ-ᱟ
ᱫᱩᱠ ᱛᱟᱞᱟ ᱨᱮ
ᱥᱩᱠ ᱫᱚ ᱩᱠᱩ ᱠᱟᱛᱮ ᱛᱟᱦᱮᱸ ᱠᱚᱜ-ᱟ ᱾
ᱧᱤᱫᱟᱹ ᱫᱟᱲᱟᱱ ᱡᱚᱠᱷᱮᱡ
ᱤᱧ ᱫᱚᱸᱧ ᱵᱚᱨᱚᱜ-ᱟ ᱟᱹᱲᱤᱡ ᱛᱮᱡ
ᱢᱚᱱᱮᱭᱟᱹᱧ ᱯᱟᱞᱮ ᱰᱟᱹᱱ ᱠᱚ ᱠᱩᱫᱟᱹᱣ ᱟᱠᱟᱫᱤᱧ
ᱯᱟᱞᱮ ᱱᱟᱡᱚᱢ ᱠᱚ ᱯᱟᱸᱡᱟ ᱟᱠᱟᱫᱤᱧ ᱾
ᱵᱷᱟᱹᱵᱤᱛᱟᱹᱧ
ᱯᱟᱞᱮ ᱪᱮᱴᱨᱟ ᱛᱟᱱᱟᱜ ᱮ ᱛᱟᱬᱟᱜ ᱟᱠᱟᱣᱟᱫ ᱫᱤᱧ
ᱯᱟᱞᱮ ᱦᱟᱰᱜᱟᱨ ᱛᱟᱱᱟᱜ ᱮ ᱛᱟᱲᱟᱢ ᱟᱠᱟᱫ
ᱤᱧ ᱛᱟᱭᱚᱢ ᱛᱟᱭᱚᱢ ᱛᱮ ᱾
ᱛᱟᱭᱚᱢ ᱥᱮᱫ ᱠᱚᱭᱚᱜ ᱨᱩᱣᱟᱹᱲ ᱥᱟᱹᱱᱟᱹᱧᱟ
ᱤᱠᱷᱟᱹᱱ ᱜᱩᱨᱩ ᱠᱚᱠᱚ ᱢᱮᱱ ᱟᱠᱟᱫ
ᱵᱚᱸᱜᱟ ᱠᱚᱣᱟᱜ ᱧᱩᱛᱩᱢ ᱧᱩᱢ ᱛᱟᱭᱚᱢ
ᱛᱟᱭᱚᱢ ᱥᱮᱫ ᱠᱚᱭᱚᱜ ᱨᱩᱣᱟᱹᱲ ᱢᱟᱱᱟ ᱜᱮᱭᱟ ᱾
ᱛᱮᱦᱮᱧ ᱫᱚ ᱤᱧ ᱟᱹᱰᱤ ᱡᱩᱨᱤᱧ ᱵᱚᱨᱚ ᱮᱱᱟ
ᱪᱮᱫ ᱪᱚ ᱤᱧ ᱛᱟᱭᱚᱢ ᱥᱮᱫ ᱨᱮ ᱞᱟᱴᱟ ᱥᱮᱫ ᱨᱮ ᱥᱟᱰᱮᱭᱮᱱᱟ
ᱚᱱᱰᱮ ᱠᱷᱚᱱ ᱪᱤᱞᱤ ᱪᱚ
ᱤᱧ ᱮ ᱯᱟᱸᱡᱟ ᱟᱠᱟᱫᱤᱧ ᱞᱮᱠᱟᱹᱧ ᱟᱹᱭᱠᱟᱹᱣ ᱠᱮᱫ ᱟ ᱾
ᱯᱟᱪᱷᱮ ᱛᱟᱭᱚᱢ ᱠᱷᱚᱱ ᱤᱧ ᱮ ᱦᱟᱹᱲᱩᱵ ᱮᱢᱟᱱᱤᱧᱟ,
ᱯᱟᱪᱷᱮ ᱛᱟᱭᱚᱢ ᱠᱷᱚᱱ ᱮ ᱚᱨ ᱨᱩᱣᱟᱹᱲ ᱤᱧᱟ?
ᱠᱚᱭᱚᱜ ᱨᱩᱣᱟᱹᱲ ᱥᱟᱱᱟᱹᱧᱟ
ᱤᱠᱷᱟᱹᱱ ᱜᱩᱨᱩ ᱠᱚᱠᱚ ᱢᱮᱱ ᱟᱠᱟᱫ
ᱵᱚᱸᱜᱟ ᱠᱚᱣᱟᱜ ᱧᱩᱛᱩᱢ ᱧᱩᱢ ᱛᱟᱭᱚᱢ
ᱛᱟᱭᱚᱢ ᱥᱮᱫ ᱠᱚᱭᱚᱜ ᱨᱩᱣᱟᱹᱲ ᱢᱟᱱᱟ ᱜᱮᱭᱟ ᱾
ᱢᱟᱬᱟᱝ ᱨᱮᱱ ᱫᱚ ᱡᱟᱦᱟᱱᱤᱡ ᱜᱮ
ᱩᱱᱟᱹᱜ ᱵᱟᱹᱧ ᱵᱚᱨᱚ ᱟᱠᱚᱣᱟ
ᱤᱠᱷᱟᱹᱱ ᱛᱟᱭᱚᱢ ᱨᱮᱱ ᱫᱚ ᱟᱹᱰᱤ ᱛᱮᱫ ᱜᱮᱧ ᱵᱚᱨᱚ ᱟᱠᱚᱣᱟ ᱾
ᱜᱩᱨᱩᱣᱟᱜ ᱠᱟᱛᱷᱟ ᱮᱱᱰᱟᱜ ᱠᱟᱛᱮ
ᱛᱟᱭᱚᱢ ᱥᱮᱫ ᱤᱧ ᱠᱚᱭᱚᱜ ᱨᱩᱣᱟᱹᱲ ᱠᱮᱫ ᱜᱮᱭᱟ
ᱰᱟᱹᱱ, ᱱᱟᱡᱚᱢ, ᱪᱮᱴᱨᱟ, ᱦᱟᱰᱜᱟᱨ
ᱤᱧ ᱫᱚ ᱪᱤᱞᱤ ᱦᱚᱸ ᱵᱟᱠᱚ ᱠᱩᱫᱟᱹᱣ ᱟᱠᱟᱫᱤᱧ
ᱪᱤᱞᱤ ᱦᱚᱸ ᱵᱟᱠᱚ ᱯᱟᱸᱡᱟ ᱟᱠᱟᱫ᱾ᱧ
ᱤᱧ ᱫᱚ ᱵᱚᱛᱚᱨ ᱜᱮ ᱠᱩᱫᱟᱹᱣ ᱟᱠᱟᱫᱤᱧ
ᱵᱚᱛᱚᱨ ᱜᱮ ᱯᱟᱸᱡᱟ ᱟᱠᱟᱫᱤᱧ ᱾
ᱯᱷᱮᱥᱵᱩᱠ-ᱡᱟᱞᱟᱢ ᱠᱷᱚᱱ
ᱵᱟᱹᱲᱭᱟᱹ ᱛᱮᱧ ᱯᱩᱪᱩᱡ ᱮᱱᱟ ᱾
ᱵᱷᱟᱹᱵᱤ ᱞᱮᱫᱟᱹᱧ
ᱱᱤᱛ ᱫᱚ ᱥᱟᱹᱱᱛᱤ ᱛᱮᱧ ᱯᱟᱭᱨᱟ ᱵᱟᱲᱟᱭᱟ
ᱚᱠᱟ ᱥᱮᱫ ᱤᱪᱷᱟᱹ ᱚᱱᱛᱮᱧ ᱯᱟᱭᱨᱟ ᱥᱮᱱᱚᱜ-ᱟ ᱾
ᱢᱟ ᱟᱨᱦᱚᱸ
ᱦᱩᱣᱟᱴᱥᱟᱯ-ᱡᱟᱞᱟᱢ ᱨᱮᱧ ᱡᱷᱟᱹᱞᱤᱭᱮᱱ!
ᱚᱱᱰᱮᱧ ᱯᱷᱮᱧᱪᱚᱲ ᱵᱟᱲᱟᱭᱮᱱᱟ
ᱵᱟᱹᱲᱭᱟᱹ ᱛᱮᱧ ᱯᱩᱪᱩᱡ ᱮᱱᱟ ᱾
ᱮᱴᱟᱜ ᱥᱮᱫ ᱤᱧ ᱢᱚᱦᱰᱟ ᱮᱱᱟ
ᱢᱟ!
ᱛᱤᱱ ᱨᱮᱪᱚ ᱤᱱᱥᱴᱟᱜᱽᱨᱟᱢ ᱡᱟᱞᱟᱢ ᱨᱮᱧ ᱯᱟᱲᱟᱣ ᱟᱠᱟᱱ
ᱤᱧ ᱫᱚ ᱛᱷᱤᱛ ᱜᱮ ᱵᱟᱝ ᱾
ᱚᱱᱟ ᱡᱟᱞᱟᱢ ᱠᱷᱚᱱ ᱯᱩᱪᱩᱡᱚᱜ ᱞᱟᱹᱜᱤᱫ
ᱡᱩᱨ ᱛᱮᱧ ᱯᱷᱮᱧᱪᱚᱲ ᱞᱮᱱᱟ
ᱭᱩᱴᱭᱩᱵᱽ ᱡᱟᱞᱟᱢ ᱨᱮ ᱯᱟᱹᱥᱤᱨ ᱠᱟᱛᱮᱧ ᱞᱟᱴᱠᱟᱣ ᱮᱱᱟ ᱾
ᱟᱫᱚᱸᱧ ᱛᱷᱤᱨ ᱜᱚᱫ ᱮᱱᱟ ᱾
ᱦᱟᱭ!
ᱜᱚᱴᱟ ᱜᱮᱭᱟ ᱡᱟᱞᱟᱢ ᱠᱚ ᱚᱰᱟᱣ ᱟᱠᱟᱫ ᱫᱚ
ᱱᱩᱠᱩ ᱡᱟᱞᱟᱢᱤᱭᱟᱹ ᱾
ᱱᱤᱛ ᱡᱟᱦᱟᱸ ᱨᱚᱝ
ᱤᱧᱟᱜ ᱦᱚᱲᱢᱚ ᱨᱮᱢ ᱧᱮᱞ ᱮᱫᱟ
ᱚᱱᱟ ᱫᱚ ᱫᱷᱤᱱᱟᱹᱝ
ᱵᱟᱝ ᱛᱟᱦᱮᱸᱱᱟ ᱾
ᱫᱷᱤᱱᱟᱹᱝ ᱡᱟᱦᱟᱸ ᱨᱚᱝ
ᱤᱧᱟᱜ ᱦᱚᱲᱢᱚ ᱨᱮᱢ ᱧᱮᱞᱟ
ᱚᱱᱟ ᱜᱟᱯᱟ
ᱵᱟᱝ ᱛᱟᱦᱮᱸᱱᱟ ᱾
ᱢᱤᱫᱴᱟᱝ ᱨᱚᱝ
ᱞᱮᱛᱟᱲ ᱦᱚᱨᱚᱜ ᱠᱟᱛᱮ
ᱛᱟᱦᱮᱸᱱ ᱫᱚ ᱚᱦᱚᱣᱟᱱ ᱜᱮᱭᱟ ᱾
ᱚᱠᱛᱚ ᱡᱟᱹᱱᱤ ᱦᱚᱲᱢᱚ ᱨᱮᱭᱟᱜ ᱨᱚᱝ
ᱵᱚᱫᱚᱞ ᱦᱩᱭᱩᱜ-ᱟ ᱾
ᱤᱧᱟᱜ ᱚᱱᱚᱬᱦᱮ ᱫᱚ ᱵᱤᱥ ᱠᱟᱱᱟ
ᱟᱢᱟᱜ ᱢᱚᱬᱮ ᱦᱟᱡᱟᱨ ᱴᱟᱠᱟ ᱨᱮᱭᱟᱜ ᱢᱚᱱᱮ
ᱤᱧᱟᱜ ᱢᱚᱬᱮ ᱴᱟᱠᱟ ᱨᱮᱭᱟᱜ ᱚᱱᱚᱬᱦᱮ
ᱠᱷᱟᱨᱟᱯ ᱜᱚᱫ ᱠᱟᱜ-ᱟᱭ ᱾
ᱤᱧᱟᱜ ᱚᱱᱚᱬᱦᱮ ᱫᱚ ᱵᱩᱞᱩᱝ ᱠᱟᱱᱟ
ᱟᱢᱟᱜ ᱢᱤᱫ ᱵᱟᱹᱴᱤ ᱢᱚᱱᱮ
ᱤᱧᱟᱜ ᱢᱤᱫ ᱴᱤᱰᱟᱹᱜ ᱚᱱᱚᱬᱦᱮ
ᱟᱫᱟ ᱜᱚᱫ ᱠᱟᱜ-ᱟᱭ ᱾
ᱡᱤᱭᱚᱱ ᱰᱷᱚᱸᱜᱟ ᱫᱚᱛᱤᱧ
ᱞᱤᱵ ᱞᱟᱵᱚᱜ ᱠᱟᱱ
ᱥᱚᱝᱥᱟᱨ ᱥᱟᱹᱢᱩᱫᱽ ᱛᱟᱞᱟ ᱨᱮ,
ᱦᱟᱱᱟ ᱰᱷᱤᱯ ᱦᱚᱸ ᱵᱟᱝ
ᱪᱮ ᱱᱚᱶᱟ ᱰᱷᱤᱯ ᱦᱚᱸ ᱵᱟᱝ
ᱦᱟᱱᱟ ᱯᱩᱨᱤ ᱦᱚᱸ ᱵᱟᱝ
ᱪᱮ ᱱᱚᱶᱟ ᱯᱩᱨᱤ ᱦᱚᱸ ᱵᱟᱝ,
ᱤᱧ ᱢᱟ ᱛᱟᱞᱟ ᱯᱩᱨᱤ ᱨᱮ
ᱤᱧ ᱢᱟ ᱡᱟᱞᱟ ᱯᱩᱨᱤ ᱨᱮ,
ᱡᱤᱭᱚᱱ ᱰᱷᱚᱸᱜᱟ ᱫᱚᱛᱤᱧ
ᱞᱤᱵ ᱞᱟᱵᱚᱜ ᱠᱟᱱ
ᱥᱚᱝᱥᱟᱨ ᱥᱟᱹᱢᱩᱫᱽ ᱛᱟᱞᱟ ᱨᱮ ᱾
ᱤᱧᱤᱧ ᱵᱤᱞ ᱟᱠᱟᱱ ᱯᱟᱨᱠᱚᱢ ᱮ ᱜᱤᱛᱤᱡ ᱟᱠᱟᱱ ᱾ ᱑ ᱤᱧ ᱪᱮᱛᱟᱱ ᱨᱮ ᱦᱟᱥᱟ, ᱫᱷᱤᱨᱤ ᱠᱚ ᱟᱴᱮᱫ ᱟᱠᱟᱱ ᱚᱱᱟ ᱪᱮᱛᱟᱱ ᱨᱮ ᱯᱟᱨᱠᱚᱢ ᱮ ᱜᱤᱛᱤᱡ ᱟᱠᱟᱱ ᱾ ᱒ ᱤᱧ ᱫᱚᱸᱧ ᱞᱟᱛᱟᱨ ᱟᱠᱟᱱ ᱯᱟᱨᱠᱚᱢ...